## علاقات حميمة ##
... بقالي تقريبا ً شهرين تلاتة بحاول اضبط علاقات مع بيّـاع الفرن اللي قدام بيتنا ,, وياما نزلت من بيتنا بدري وفضلت مستنيه .. بس ده محدش بيصحى قبليه أبدا ً .. بصراحة أنا بحلم باليوم اللي اقدر آخد من (( حضرته )) معاد واطلب الود وافــرش بياضي علشان ما اقفش في طابور الموت (( طابور العيش )) .
## جوّه المناخير ##
.. خلاص الناس ماشية بتكلم نفسها في الشارع واللي يضحك منهم واللي يبكي عليهم .. وشوية شوية هيمشوا في الشوارع (( عريانين )) وكمان بقو يمارسو شوية أفعال (( مقززة )) لا إرادية عيانا ً بيانا ً في عز النهار وفي وسط أكبر تجمع جماهيري _ بقت الناس _ بتلعب في مناخيرها !!
وبيطلعو منها (( القرف )) شوية حاجات متحجرة .. عادم العربيات المتكحورة .. وشتيمة شاب عاطل حالته النفسية متأخرة .. و (( لبانة )) آانسة عانس بتحلم بكوشة منورة .. وكراريس تلاميذ تحت طاسة زيت متنطورة .. وجزمة مواطن كل اما يمشي خطوة قدام يرجع (( كيلو )) ورا .. كل ده جوّه المناخير !!
##شعب غلبان ومفتري ##
.. وبنشتكي الغلاء وبنقول إزازة الزيت أغلى من (( جيركن )) بينزين وبندّور على مارد يخرج من الفانوس ينظم طابور العيش ومصاريف الدروس اللي ماشية على ظروفنا بتدوس وبرغم كده يا حضرة (( الشعب الشاكي )) ,, شارع عبد العزيز مليان أطفال وشباب ونسوان اللي بيشتري موبايل تاني او تالت او رابع او ممكن خامس كمان مين قال إن الشعب بيعاني الحرمان .. بيبيعو الموبايل القديم بخسارة فلوس وبيشترو جديد بضعف الاتمان ,, وكل واحد يرجع بيتو فارس شجاع حقق إنجاز وكسبان .. يا بلد يا بلد يا بلد (( موبايلات بقى ,, أو ,, كلمني شكرا ً ))