لبـــســـت الإســــــدال

ودي آخر سنة في الجامعة ..
قلت لنفسي ... لازم اروح وآخد بالي من محاضراتي
رحت لقيت الزحمة زحمة .. بحق ربنا
ولقيت الضحك شغااااااااال (( على ودنو )) ..
الهزار والتهريج .. وناس معندهاش غير التفريج

من بعيد .. قلت اروح آخد جدولي ..
ولقيت واحد من شلتي ..
قلتلو : ياللا بينا ..
قاللي :: فين
قلتلو : عند لوحة الإعلانات
.. وهناك لقيت شلة كبيرة كلها .. بنات في بنات
حاسبي يا أختي لو سمحتي !!
عايز اكتب زي ما كتبتي ..
وقلت لصاحبي ياعم دي مكتوبة إيه ؟
قاللي :: دي محاضرة إسمو إيه !!!
وشاورتلو .. على واحدة واقفة هناك بعيد
قام شاورلي على واحدة تانية واقفة هنا
قلتلو : مين دي .. شكلها مش من بلدنا
قاللي :: لأ وحياتك دي بنت بلدنا
والدم أهو .. عمّال بيجري في وشها ..
قلتلو : هي لابسة كده ليه ؟
قاللي :: دي موضة .. بتسأل ليه ؟!
قلتلو : أصلها بتفكرني بالحريم اللي بتطلع في مظاهرات (( طهران ))
قاللي :: برضو زي الأمهات اللي بتعيط في شوارع بغداد
قلتلو : ياااااااااااااااااااه .. الموضة دي فاتت بلاد
قاللي :: أكيد .. بس اللبس ده يبقى اسمو إيه
قلتلو : ما أنا بسألك .. مجاوبتكش ليه !!
سألناها .. وريحنا بالنا ..
يا آنسة ياللي قدامنا ..
ممكن سؤال ؟؟ ..
.. افتكرت صاحبي بيغلس
وافتكرتني تافه ومفلــّس
وبصت تاني قدامها ..
قلت لصاحبي .. بقولك إيه (( احنا نتكلم قدامها ))
وهي هــ تنطق وهــ تصحح مفاهمنا
قلنا كلام أنا وصاحبي .. عن اللي شاغلنا
وقلتلو : متهيألي ده (( مــَـلس )) .. ملس صعيدي
قاللي :: دي عباية سعودي
قلتلو : لأ ده شبه نقاب يا عم
قاللي :: إيه !! ده مالوش دعوة بالنقاب
قلتلو : طب ده إيه .. وبيجيبوه منين ؟
وظهر في بلدنا إمتى وفين ؟
شكلها كانت عايشة في إيران !!
ولا ّ تلاقيها من إيران !!
قاللي :: يا أخي .. بقولك دي بنت بلدنا
وقلتلو : إيش فهمك إنت في البنات
.. وجات بنت من ورانا ومعاها بنت
البنت قالت للي معاها .. (( بـُصي يا نورة شايفة حلاوة الإسدال ))
لفيت قوام .. أنا وصاحبي ناحية البنتين اللي ورانا .. وقلنالهم
ده اسمو إيه ..
قالو ::: (( إسدال ))
إس دال .. (( ده مــُركب نسائي جديد ))
بيتحضـّر في معامل تكريت
وجابته ثورة إيران
ونشرته حرب الخليج
بيحرق دم (( أمريكا ))
وألوانه الغامقة .. حريقة
موجود في السوق وسعره عال
أنا حتى بفكر البس إسدال .. (( ده كلام البنت ))
.. وقلت لنفسي يا واد قوام ..
روح بيتك وشوف أختك وشوف حبيبتك
رحت بس فات الأوان .. في ربع ساعة البلد لبست إسدال
ده مش إسدال .. ده احتلال .. ثقافة جديدة زوالها محال
حتى العيال .. لبست اسدال ..
وبقى مقياس للجمال .. وبقتلو تفصيلة وألوان
رحت لخطيبتي علشان نخرج سوى ..
اشترطت عليا علشان يدوم بينا الهوى ..
(( إني اجيبلها إسدال )) .

سكة السلامــة

اد ايه احنا غلابة وحتى اللي ربنا بينعم علينا بيه مش بنستخدمه صح

عملو رحلة فالمدرسة عند ريم اختي اللي فأولى حضانة وروحت معاها لوادي كده فالفيوم اسمو ايه وادي الحيتان مش الريان عشان الناس اللي بتعمل نفسها بتفهم وكمان كنا هنروح الريان .. بتقولوا ايه وادي الحيتان مين ياولاد وادي الحيتان .. قولت نروح نشوف ايه الحكاية دي اللي بيقولوا عليها عبارة عن مكان كده فوسط الصحراء مليان هياكل عظمية عمرها 40مليون سنة بتاعة حيتان ويعتبر المكان الوحيد فالعالم اللي بيشرح تطور الحيتان

حلو لحد كده .. بس اللي جاي مش حلو خالص

أتحركنا من مكانا الساعة 10 الصبح الاطفال والمدرسين بتوعهم في باص كبير تابع لوزارة التربية والتعليم وأولياء الامور في ميكروباص متأجر
سواق الباص أول مرة يروح المشوار ده وجاي على اساس أن اولياء الامور كلهم عارفين الطريق .. وأولياء الامور جايين رحلة اول مرة يطلعوها ومايعرفوش حاجة وجايين يركبوا مع سواق الميكروباص .. وسواق الميكروباص طالع الرحلة وعارف انو هيمشي ورا سواق الاتوبيس و ده كان السبب في أننا توهنا اول مرة لحد فين وفين لما سألنا وولاد الحلال قالولنا ارجعوا ياحلويين ده وادي الحيتان ورا ارجعوا تاني !
الحمد لله بعد ما الساعة وصلت لوحدة ونص ظهراً رجعنا تاني ولئينا يافته ماتدخلش فذمتي بتلاتة ابيض مكتوب عليها جمعية وادي الحيتان
دخلنا بئى الطريق عبارة كده عن طريق كلمة مقفهر عليه شوية وعبارة عن انك تمشي 65 كيلو في صحراء جرداء مافيهاش عود بانجو حتى وكمان ياريتو طريق اسفلت زي الناس الكويسين لأ ده طريق مدقدق (بلغة الناس المحنتفة مكسر)ولازم تمشي فيه بعربية جيب واللي ماحلتوش جيب يركب الناقة ويشرخ تخيل نفسك شارخ 65 كيلو بالناقة
المهم طبعا ماحدش قالنا عالمعلومة الخطيرة دي حتى الناس اللي قطعولنا التذاكر مش فهمونا وكمان عرفنا لما رجعنا موضوع الـ65كيلوالصدمة بئى بعد مامشينا شوية حلوين كده وماوصلناش للموقع اكتشفنا اننا لو كملنا مش هيكون معانا بنزين كافي أننا نرجع تاني لأن اول محطة بنزين ممكن نقابلها في طريقنا على اول طريق الفيوم من ناحية الجيزة فقررنا ان الاتوبيس يلف ويرجع .. الاتوبيس وهو بيلف غرس في الرمل
لولولولولولولولولولولييييييييييييي
الاتوبيس غرس فالرمل والموبيلات مافيهاش شبكة والبنزين قرب يخلص ومفيش جنس مخلوق ولا عربية طبعا عالطريق (ما طبعا مين الاهبل ابن الاهبل اللي هيعمل في نفسه كده )الساعة اتنين ظهراً في عرض الصحراء مجموعة من البشر الفدائيين بيضيعوا رسمييي
المهم خرجنا ورجعنا من الطريق ده وكالعادة توهنا واحنا رايحيين وادي الريان زي ماتوهنا واحنا رايحيين وادي الحيتان وزي ماتوهنا واحنا رايحيين الفيوم من الاول وتوهنا شوية كمان واحنا مروحين فالاخر

والنبي قولولي بئى مكان زي ده عالمي واثري ويعتبر هبه من الله ادهلنا زيها زي النيل كده ليه مانحولش ننميها ونعملها طريييق ومرااااااااافق وقرى سياحية زي البني ادمين الكويسين حد يقولي بس انا عيزة اعرف واهي حاجة تجيب دخل هايل لأنها مفيش غيرها فالعالم

المهم خرجنا الاتوبيس وجينا الغريب إننا جينا تاني

وجينا الساعة تمانية بالليل بعد ماكان المفترض اننا نوصل بيوتنا الساعة اربعة العصر

بس خير خير خير

ليه المذاكرة وحشة أوي كده

LEH ALMOZAKRA W7SHA AWY KDA

الحمد لله ربنا هداني وخدت قرار اني لازم اذاكر ، دخلت الاوضة وفتحت الكمبيوتر وعملت كولكشن أغاني جميل جداً عشان اسمعه وانا بذاكر (أغاني !!! اول القصيدة كـُفر) وسميته كولكشن المذاكرة وكانت مدته 7ساعات (قال يعني انا هذاكر 7ساعات)
المهم خلصت الكولكشن وجبت كتاب تاريخ الشرق الادنى ولسه بفتحه .. وهب ببص فالساعة لئيتها بئت 5 ايه ده معاد برنامج من ملفات الـ FPI طب مش مشكلة اروح اتفرج عليه واكمل مذاكرة (قال يعني البت بدأت لما هتكمل) اتفرجت عليه وقولت عيب بئى اخلي عندي دم روحت عملت كوباي شاي ورجعت الاوضة وجبت الكتاب .. فين القلم الرصاص ؟!
يووه القلم راح فين .. فين القلم راح .. مريم انتي خدتي قلمي الرصاص الله يخرب بيتك لسه هدور عليه
أهه الحمد لله لئيته .. ايه ده الساعة 7 زمان مسلسل ريا وسكينا هيبدأ الله بحبه اوي افرجت عليه كتيييييير لدرجة اني ممكن امثلهلكم .. وكمان النهارده حلقة القبض عليهم طب الدنيا ماطرتش اتفرج عليه والمذاكرة مش هتطير يعني
........................
باك نكمل مذاكرة .. ياااااااه ايه ده ايه اللي سمعاه من الشارع ده يالهوي الماتش انا ازاااي نسيته لألألأ مش قادرة لازم أروح اشوفه لحسن اروح الجامعة واقول لصحابي مشفتوش يتريئوا عليا .. عن اذنك ياكتاب !
..................
الساعة بئت 11 اروح بئى اسمع انا والنجوم وهواك اشوف اسامة منير جايب ايه النهارده فالراديو و احاول اذاكر ...
هااااااااااااااااااو .. عيزة انام خخخخخخخخخخخخخخخخخخخخخخخخخ


فيه ايه احنا ليه بنهرب من المذاكرة وبنكرهها موت كده وبننكش بمية منكاش على الجري منها
هى فعلا المذاكرة بعبع مرعب للدرجة دي .. طب هو احنا ليه اصلا بنذاكر يعني اللي خدوا شهادات عملوا ايه بيها اساساً ؟!
ايه ياامي السؤال الغبي ده اكيد بنذاكر عشان الواحد ميبئاش فرجة العيلة وراح الساقط جه الساقط والصيف يجي وكله يسافر يغير جو وانا الوحيد اللي اسمع جملة جرى ايه ياابو كحكة حمرا انت فاكر نفسك جاي معانا ولا ايه؟!!!
متهيألي معظمنا بيذاكر للهدف السامي ده (سامي اخو سعاد)
عمري فحياتي ماسألت حد السؤال ده وسمعته قال::
عشان ابئى بني آدم // عشان الناس تحترمني // عشان مايبئوش اللي حواليا كلهم بيفهموا وانا وباب الشقة واحد

والله العظيم ده الواقع دلوقتي الواحد بيروح المدرسة الصبح وهو متبرمج انو يحفظ عشان يدخل يدش في الامتحان ويخرج منه ناسي الورقة كان شكلها ايه (ياستي فكك ماامتحناها خلاص)
بنفضل بالمنظر ده عمرنا كله لحد الجامعة (ده لوطولناها اصلاً) وبعدين اذا شاء الرحمن ودخلناها بيكون معدل التخلف عندنا وصل لأوجه .. وممكن يدونا شهادة الغباء عن جدارة...
طب العيب مننا ولا من المناهج ولا المدرسين حد يقولي انا بس عيزة اعرف
ماهو مش معقول جيل بحاله عنده تخلف
يعني انا مثلاً كنت دائماً اروح امتحان الرياضة وارجع منه ماما تستقبلني بالسؤال التقليدي ؟!
حليتي ايه يانور؟
حليت ده وده وده بس ياماما
تقولي : آه بستنى انا كلمة بس دي ...
عمري فحياتي ماحليت امتحان رياضة ولا حساب على بعضه زي البني آدمين (وكانوا عيزين يدخلوني تجارة .. ايه الخيال ده)
فعلاً بكره الارقام (مع احترامي لكل مؤيديها) لكن بجد يعني ايه تفاضل عبارة عن ايه يعني ولا ايه حساب مثلثات هعمل بيه ايه فحياتي يعني انا مالي جبر ايه جبر هينفعني فأيه
لكن عربي الله عالعربي تاريخ أحسن ناس انجليزي حبيب هارتي
مخي أدبي صرف
اكيد هو ده السبب لو كل واحد درس الحاجة اللي بيحبها هيجرى ايه فالدنيا
محسوبتكم تانية اداب تاريخ وصلتها بالضالين يلا عقبال الصغيريين

ابــــن نــــاس

أنا عايش وسط ناس
بين ملايين الناس
بمشي عالأرض وادوس
ومن شمس الصيف بداس
ودا جاي من بعيد
رصيد فلوسه يزيد
كلنا بنتخانق على زير مية سخنة
وهو بيشرب كاس
دا طلع ابن ناس
هربان مالشمس رايح للظلة
قرفان يمشي تحت الشجر
ماسك منديل من بتاع الشلة
شاف العرق حس بخطر
فعلا ً فعلا ً ابن ناس
مالمسش مره التراب
ماجابش عيش مالفرن
ماحلمش مرة بسراب
مايعرفش يكتب حزن
ماشي وسطنا مجبور
قال زهق زحمة مرور
خاف عالــHummar الجديدة
لا تقف جنبها 28
أو نص نقل عريضة
متسمكرة واخدة وشين


وكان مره الــHummar الجديده
داخلة حواري الجمالية
وقفها ضابط خد تأبيدة
واترفد مالداخلية
دا طلع ابن ناس
أبوه في مركز حساس
يا عيني عليكي يانفسي
لما تحبي تقسي
تنيميني بلا طعام
عادي ما أنا من العوام
احنا بنطمح نكون بشر
لمينا فلوس وشرخ بيتنا اتستر
وعن صحتي ما تسألشي
أنا من جنبي ما بنامشي
ابن الناس طلعلي في منامي
وبينلي اني مابحلمشي
بحلم بالزاد ..
نفسي اقدم على عداد
ويحلم هو بالعيد ميلاد
اللي هيعملو في كل بلاد
انا اعرف واحد مالوش
شهاده ميلاد
مالوش موقف مالتنجنيد
معندوش شبشب جديد
ماكلش غذا مفيد
بس خد عالاعتياد




ابن الناس مفلس معوش وقية حشيش
وبنات النادي بتغلس مصدعة دماغو بشواكيش
حرام دا يحصل
غريبة ماتجيش
بس على مين هو هيسكت
هيرمي بلاه على صحابو لحد مايضبط
ما بيشلش أبدا ً هم
وناس همها ما يتلم
دموعهم يوماتي موجودة
وأحزانهم عالفرح مضبوطة
بيضحكو على نكته تلات تربعها حدوتة
نفسهم ونفسهم وأمانيهم جوه العظم مكبوتة
مهما ضحكو واتمنو همهم هو الاساس
مهما كلو أو ما كلوش شكرو
والكفوف بالرضى تتباس
في الاصل هما زي غيرهم
دولا أكتر لايق يكونو ولاد ناس .